ശ്രദ്ധിക്കുക...

‘മുഖാമുഖം’ ശബാബ് വാരികയില്‍ വരുന്ന ചോദ്യോത്തര പംക്തിയാണ്. ശബാബിന്റെ ചീഫ് എഡിറ്റര്‍, ‘മുസ്‌ലിം’ എന്ന തൂലികാനാമത്തിലാണിതെഴുതുന്നത്. പ്രിന്റഡ് എഡിഷന്‍ ലഭ്യമല്ലാത്തവര്‍ക്ക് ഉപകാരപ്പെടണമെന്ന് കരുതിയാണ് ഈ ബ്ലോഗ്. കമെന്റുകള്‍ ആശാവഹമെങ്കിലും ഇതൊരു വാദപ്രതിവാദത്തിനുള്ള വേദിയല്ല തന്നെ. ഇത് വായിക്കുന്നവര്‍ക്കുണ്ടാകുന്ന സംശയങ്ങള്‍ക്ക്, 'Mukhamukham', Shabab Weekly, Markazudawa, RM Road Kozhikode, 673 002 എന്ന വിലാസത്തിലോ shababweekly@gmail.com എന്ന ഈ മെയിലിലോ ബന്ധപ്പെടാവുന്നതാണ്.

എന്തുകൊണ്ട്‌ നബിദിനാഘോഷത്തെ മാത്രം എതിര്‍ക്കുന്നു?


ഇസ്‌ലാമില്‍ രണ്ട്‌ ആഘോഷം മാത്രമേയുള്ളൂ (ബലിപെരുന്നാള്‍, ചെറിയ പെരുന്നാള്‍). എന്നാല്‍ ഇസ്‌ലാമിക സമൂഹത്തില്‍, വിവാഹം, പുതുവത്‌സരം, കുട്ടിയുടെ ജനനം, ഓണനാളുകള്‍, ക്രിസ്‌തുമസ്‌ തുടങ്ങിയവ ആഘോഷിക്കപ്പെടാറുണ്ട്‌. എന്നാല്‍ ഇതിനെ ആരും നിഷിദ്ധമെന്ന്‌ പറയാറുമില്ല. എന്നാല്‍ നബിദിനാഘോഷത്തെ മുജാഹിദുകള്‍ എതിര്‍ക്കുന്നു. മേല്‌പറഞ്ഞ ആഘോഷങ്ങള്‍ ആവാമെങ്കില്‍ നബിദിനാഘോഷവും കൊണ്ടാടുന്നതില്‍ എന്താണ്‌ തെറ്റ്‌?
സ്വാലിഹ്‌ ഈരാറ്റുപേട്ട

മുസ്‌ലിം സമൂഹത്തില്‍ എക്കാലത്തും ആദര്‍ശപ്രതിബദ്ധതയുള്ളവരും ഇല്ലാത്തവരും ഉണ്ടായിട്ടുണ്ട്‌. ആദര്‍ശ പ്രതിബദ്ധതയുള്ളവര്‍ ആഘോഷം ഉള്‍പ്പെടെ ഏത്‌ കാര്യം ചെയ്യുമ്പോഴും അത്‌ അല്ലാഹുവും റസൂലും (സ) അനുവദിച്ചതാണോ എന്ന്‌ നോക്കണം. വിവാഹം അല്‌പമൊക്കെ ആഘോഷമായി നടത്തുന്ന സമ്പ്രദായം നബി(സ)യുടെ കാലത്തും ഉണ്ടായിരുന്നു. ധൂര്‍ത്ത്‌, പൊങ്ങച്ചം തുടങ്ങിയ വിലക്കപ്പെട്ട കാര്യങ്ങള്‍ വര്‍ജിച്ചുകൊണ്ടാവണം വിവാഹാഘോഷം. ക്രിസ്‌തുമസും ഓണവും ഓരോ വിഭാഗങ്ങളുടെ മതപരമായ ആഘോഷങ്ങളാണ്‌. മുസ്‌ലിംകള്‍ ഇസ്‌ലാമികമല്ലാത്ത മതാഘോഷങ്ങളൊന്നും നടത്താന്‍ പാടില്ല.

കുട്ടികളുടെ ജനനവും കൊല്ലങ്ങളുടെ മാറ്റവും നബി(സ)യുടെ കാലത്തും ഉണ്ടായിരുന്നല്ലോ. എന്നാല്‍ അദ്ദേഹമോ അനുചരന്മാരോ ഒരു കുഞ്ഞിന്റെയും ജന്മദിനം ആഘോഷിച്ചിട്ടില്ല. ചാന്ദ്രവര്‍ഷത്തിന്റെയോ സൗരവര്‍ഷത്തിന്റെയോ ആരംഭം ഉത്‌സവമാക്കിയിട്ടുമില്ല. നമ്മുടെ സച്ചരിതരായ പൂര്‍വികര്‍ ഈ ആഘോഷങ്ങള്‍ വേണ്ടെന്ന്‌ വെച്ചത്‌ ഇസ്‌ലാമിക സംസ്‌കാരത്തില്‍ അവയ്‌ക്ക്‌ സ്ഥാനമില്ലാത്തതുകൊണ്ടാണ്‌. ആദര്‍ശപ്രതിബദ്ധതയില്ലാത്തവര്‍ പല ആഘോഷങ്ങള്‍ നടത്തും. അതുകൊണ്ട്‌ അവയ്‌ക്ക്‌ ഇസ്‌ലാമികമായ സാധുത കൈവരുകയില്ല.

എന്നാല്‍ അല്ലാഹുവും റസൂലും(സ) പഠിപ്പിക്കാത്ത ഒരു കാര്യം മതപരമായ പുണ്യകര്‍മം എന്ന നിലയില്‍ ആചരിക്കുന്നതും മതത്തിന്റെ ഭാഗം എന്ന നിലയിലല്ലാതെ ഒരു ആഘോഷം നടത്തുന്നതും തമ്മില്‍ വ്യത്യാസമുണ്ട്‌. ഒരു വിദ്യാഭ്യാസ സ്ഥാപനത്തിന്റെയോ വ്യാപാര സ്ഥാപനത്തിന്റെയോ വാര്‍ഷികം ആഘോഷിക്കുന്നത്‌ ഒരു മതാനുഷ്‌ഠാനം എന്ന നിലയിലല്ലാത്തതിനാല്‍ നിഷിദ്ധമാണെന്ന്‌ പറയാവുന്നതല്ല. ഈസാനബി(അ)യുടെയും മുഹമ്മദ്‌ നബി(സ)യുടെയും ജന്മദിനം ആഘോഷിക്കുന്നത്‌ മതാനുഷ്‌ഠാനം എന്ന നിലയിലാണ്‌. ഇങ്ങനെയൊരു ആഘോഷം നടത്താന്‍ അല്ലാഹുവോ ഈ പ്രവാചകന്മാരോ കല്‌പിച്ചിട്ടില്ല. അതിനാല്‍ ഈ ആഘോഷം മതത്തില്‍ മാതൃകയില്ലാത്ത നൂതനാചാരം അഥവാ ബിദ്‌അത്ത്‌ എന്ന നിലയില്‍ നിഷിദ്ധമാകുന്നു.

0 അഭിപ്രായങ്ങള്‍‌:

Followers -NetworkedBlogs-

Followers