ശ്രദ്ധിക്കുക...

‘മുഖാമുഖം’ ശബാബ് വാരികയില്‍ വരുന്ന ചോദ്യോത്തര പംക്തിയാണ്. ശബാബിന്റെ ചീഫ് എഡിറ്റര്‍, ‘മുസ്‌ലിം’ എന്ന തൂലികാനാമത്തിലാണിതെഴുതുന്നത്. പ്രിന്റഡ് എഡിഷന്‍ ലഭ്യമല്ലാത്തവര്‍ക്ക് ഉപകാരപ്പെടണമെന്ന് കരുതിയാണ് ഈ ബ്ലോഗ്. കമെന്റുകള്‍ ആശാവഹമെങ്കിലും ഇതൊരു വാദപ്രതിവാദത്തിനുള്ള വേദിയല്ല തന്നെ. ഇത് വായിക്കുന്നവര്‍ക്കുണ്ടാകുന്ന സംശയങ്ങള്‍ക്ക്, 'Mukhamukham', Shabab Weekly, Markazudawa, RM Road Kozhikode, 673 002 എന്ന വിലാസത്തിലോ shababweekly@gmail.com എന്ന ഈ മെയിലിലോ ബന്ധപ്പെടാവുന്നതാണ്.

നമസ്‌കാരത്തിനിടെ ഫോണ്‍ ഓഫാക്കാമോ?

മൊബൈല്‍ ഫോണ്‍ ഇന്ന്‌ വ്യാപകമാണല്ലോ. `മൊബൈല്‍ ഓഫ്‌ ചെയ്‌തു എന്ന്‌ ഉറപ്പുവരുത്തുക' എന്ന ബോര്‍ഡ്‌ വെക്കാത്ത ഒരു മുസ്‌ലിം പള്ളിയുമില്ല. എന്നിട്ടും ചിലര്‍ അത്‌ ഓഫ്‌ ചെയ്യാതെ പള്ളിയില്‍ കയറി നമസ്‌കരിക്കാറുണ്ട്‌. അവര്‍ക്ക്‌ നമസ്‌കാരത്തില്‍ കോള്‍ വന്നാല്‍ അപ്പോള്‍ അവര്‍ അത്‌ ഓഫാക്കുന്നതും കാണുന്നു. നമസ്‌കാരത്തില്‍ മൊബൈല്‍ ഓഫ്‌ ആക്കുന്നത്‌ അനുവദനീയമാണോ?
കെ പി അബൂബക്കര്‍ മുത്തനൂര്‍

നമസ്‌കാരത്തിനിടയില്‍ തേളിനെയോ പാമ്പിനെയോ കണ്ടാല്‍ അവയെ കൊല്ലാന്‍ നബി(സ) കല്‌പിച്ചതായി അബൂഹുറയ്‌റ(റ)യില്‍ നിന്ന്‌ അബൂദാവൂദും തിര്‍മിദിയും മറ്റും റിപ്പോര്‍ട്ട്‌ ചെയ്‌തിട്ടുണ്ട്‌. നമസ്‌കരിക്കുന്നതിനിടയില്‍ ആഇശ(റ) വന്നപ്പോള്‍ നബി(സ) ചെന്നു വാതില്‍ തുറന്നുകൊടുത്തിട്ട്‌ നമസ്‌കാരത്തിലേക്ക്‌ തന്നെ മടങ്ങിയെന്ന്‌ തിര്‍മിദി, അബൂദാവൂദ്‌, നസാഈ എന്നിവര്‍ റിപ്പോര്‍ട്ട്‌ ചെയ്‌തിട്ടുണ്ട്‌. മൊബൈല്‍ ഫോണ്‍ ഓഫാക്കുക പോലുള്ള ചെറിയ പ്രവൃത്തികള്‍ കൊണ്ട്‌ നമസ്‌കാരത്തിന്‌ ഭംഗം വരുകയില്ലെന്നാണ്‌ ഇതില്‍ നിന്നൊക്കെ മനസ്സിലാക്കാവുന്നത്‌. നമസ്‌കരിക്കുന്നവര്‍ക്ക്‌ മനസ്സാന്നിധ്യം നഷ്‌ടപ്പെടുന്നത്‌ ഒഴിവാക്കുക എന്ന നിലയില്‍ ഒരു സല്‍പ്രവൃത്തിയും കൂടിയാണല്ലോ ഫോണ്‍ ഓഫാക്കല്‍. എന്നാലും നമസ്‌കാരത്തിനിടയില്‍ ശല്യമുണ്ടാകാത്ത വിധം നേരത്തെ തന്നെ ഓഫാക്കുന്നതാണ്‌ കൂടുതല്‍ ഉത്തമം എന്ന കാര്യത്തില്‍ സംശയമില്ല.

0 അഭിപ്രായങ്ങള്‍‌:

Followers -NetworkedBlogs-

Followers