റാബിത്വ സി ഐ എയുടെ ഉപകരണമാണെന്നോ?
ഇ കെ ശൗക്കത്തലി (ഓമശ്ശേരി)
"സി ഐ എയുടെ കാര്‍മികത്വത്തില്‍ ഫോര്‍ഡ്‌ ഫൗണ്ടേഷനും കാര്‍ണഗി എന്‍ഡോവ്‌മെന്റ്‌ ഫോര്‍ ഇന്റര്‍നാഷണല്‍ പീസ്‌ തുടങ്ങിയ അമേരിക്കന്‍ സ്ഥാപനങ്ങളും മുന്‍കൈ എടുത്താണ്‌ റാബിത്വത്തുല്‍ ആലമുല്‍ ഇസ്‌ലാമി രൂപീകരിച്ചത്‌. സാമ്രാജ്യത്വവിരുദ്ധ പ്രസ്ഥാനങ്ങളില്‍ വിള്ളല്‍ സൃഷ്‌ടിക്കുന്ന നാനാവിധമായ പ്രവര്‍ത്തനങ്ങള്‍ക്കാണ്‌ റാബിത്വയെയും അതിന്റെ ബഹുമുഖമായ സംഘടനാശൃംഖലയെയും ഉപയോഗിച്ച്‌ സി ഐ എ ആസൂത്രണം നടത്തിയത്‌.''
കെ ടി കുഞ്ഞിക്കണ്ണന്‍ ദേശാഭിമാനിയില്‍ (2010 ജൂണ്‍ 24) എഴുതിയ ലേഖനത്തില്‍ നിന്ന്‌. ഇതില്‍ വല്ല ശരിയുമുണ്ടോ? ഉണ്ടെങ്കില്‍ സി ഐ എയുടെ സ്വാധീനം ഇത്രമേല്‍ ഉണ്ടെന്നാണോ നമ്മള്‍ മനസ്സിലാക്കേണ്ടത്‌?
യാതൊരു തെളിവുമില്ലാതെ, തങ്ങള്‍ക്ക്‌ ഇഷ്‌ടമില്ലാത്തവരെയൊക്കെ സാമ്രാജ്യത്വത്തിന്റെ ദല്ലാളുമാരായി ചിത്രീകരിക്കല്‍ ഇടതുപക്ഷത്തുള്ള പലരുടെയും പ്രചാരണതന്ത്രത്തിന്റെ ഭാഗമാണ്‌. അമേരിക്കയില്‍ ഒട്ടേറെ സന്നദ്ധ സംഘടനകളുണ്ട്‌. ആ നാട്ടിലായതുകൊണ്ട്‌ അവയെല്ലാം സി ഐ എയുടെ കാര്‍മികത്വത്തിലാണ്‌ പ്രവര്‍ത്തിക്കുന്നതെന്‌ പറയുന്നതില്‍ ന്യായമില്ല. ഇന്ത്യയില്‍ എല്ലാ മതക്കാര്‍ക്കും ഒട്ടേറെ സേവന സംഘടനകളുണ്ട്‌. അവയെല്ലാം `റോ' പോലെയുള്ള രഹസ്യാന്വേഷണ ഏജന്‍സിയുമായി ബന്ധമുള്ളതാണെന്ന്‌ ആരോപിക്കുന്നതിന്റെ അസാംഗത്യം ആര്‍ക്കും ഊഹിക്കാവുന്നതാണ്‌. ഫോര്‍ഡ്‌ ഫൗണ്ടേഷനുമായോ കാര്‍ണഗി എന്‍ഡോവ്‌മെന്റുമായോ റാബിത്വയ്‌ക്ക്‌ ബന്ധമുണ്ടെന്നതിന്‌ വസ്‌തുനിഷ്‌ഠമായ വല്ല തെളിവും ആരെങ്കിലും ഉന്നയിച്ചതായി ഈ ലേഖകന്‌ അറിയാന്‍ കഴിഞ്ഞിട്ടില്ല.
ശരിയായ ഇസ്‌ലാമിക പ്രബോധനത്തിനും ഇസ്‌ലാമിക സേവനത്തിനും വേണ്ടി പ്രവര്‍ത്തിക്കുന്ന സംഘടനയാണ്‌ റാബിത്വത്തുല്‍ ആലമില്‍ ഇസ്‌ലാമി. മുസ്‌ലിം സമൂഹത്തില്‍ മതനിഷ്‌ഠയില്ലാതെയാക്കാനും മുസ്‌ലിംകളെ പാശ്ചാത്യസംസ്‌കാരത്തിലേക്ക്‌ അടുപ്പിക്കാനുമാണ്‌ സി ഐ എയും അനുബന്ധ സംഘടനകളും ശ്രമിക്കുന്നത്‌. എന്നാല്‍ റാബിത്വയുടെ പ്രവര്‍ത്തനങ്ങള്‍ ഇതിന്റെ വിപരീത ദിശയിലാണ്‌. ആയതിനാല്‍ റാബിത്വയ്‌ക്ക്‌ ഈ ഇസ്‌ലാംവിരുദ്ധ സംഘടനകളുമായി ബന്ധമുണ്ടാകാനുള്ള സാധ്യത വളരെ വിദൂരമാകുന്നു.
Posts
0 അഭിപ്രായങ്ങള്‍:
Post a Comment